Wednesday, January 24, 2007

Budiya..


Subah ki sunahri dhoop na jane kambal ke kis surakh se aankhon me ghus gayi aur kaano ke liye naashta taiyar tha "Raat ko itni der tak na jane kya karta rahta hai aur dopahar tak sota rahega". Har maa ko waqt me teen ghante jod kar batane ki aadat hoti hai. Lekin roz ki tarah chai ke liye rasoi me jaata uske pahle hi ek anjaan chehre ne barbas hi meri nazaron ko kheench liya.

Kandhon par umar ka bojh, hathon me kaam karne ki umang, mathe par chinta ki kuchh lakeeren aur honthon par halki si muskan liye wo aurat sirf apne kam me hi mashgul thi.

Imtahaan ke din nazdeek aane lage aur main achchhe bachchhe ki tarah subah jaldi uthane laga. Magar kamare ki khidki par padhne baithana sirf bahana tha bahar dekhne ka. Intazar to sirf lakdiya beenane wali us boodhi aurat ka hota tha na ki apne sabak poore hone ka. Wo aati ghar ke pichhwade se lakdiyan uthati, ikattha karti aur bandh kar le jati.

Ab to padhai roz hoti thi aur roz khidki se aankhon ko us bhoodhi ko dekhne ka intazaar rahta tha. Bahut dino tak silsila chalta raha par maine ye nahi socha ki ye koun hai aur kya karti hai.

Maa se ek din baton baton me pata chala ki wo ghar se thodi door par kuchh logon ke yahan par bartan manjti hai aur chulhe ke lakdiyan hamare ghar ke peechhe se chun kar le jati hai.

Dimag me lekin abhi bhi kuchh sawal kulmula rahe the jaise wo rahti kahan hai, kitne log hain uske ghar me aur sabse badi baat kis koum ki hai? Maine khud usase hi poochhne ka faisla kiya. Raat bhar sirf subah hone ke intazaar me hi kat gayi aur subah hote hi uske aane ka intazaar shuru ho gaya. Lekin mukammal waqt ke beet jane ke bad bhi uske aane ka hi intazaar tha aur raat ko bhi wahi baat ghoomati rahi ki "wo kyon nahi aayi". Aankh kab lagi pata nahi chala lekin band aankhon se raat me dekha hua sapna abhi tak yaad tha.

Baramde se jakar akhabar uathaya to uski surkhiyan bhi mere sapne ko bayaan kar rahi thi aur tasveer uski jiska kal se mujhe intazaar tha. Khabar thi "Shahar me koumi dangon me teen ghar jale."

4 comments:

bhavna2716 said...

Bhut dino bad hindi me kuch accha padne ko mila..Maja aa gaya!Apne bachpan me padi hue laghu kathao ki yaad aa gayi.Ankhoo ke pura manjar ghumne lagata hai. But visual would be better if u break it into some more paragraphs

Me Thinks.. said...

You know what, I opened it and then thought i would finish posting first and then read yours, but once i started reading i couldn stop myself..
very absorbing...
Nice imagery...
I am not sure or maybe I dont know but when I was reading full hindi, suddenly I saw some urdu words, it would be better if you could maintain a continuity..
Otherwise very well written..

mystupendoussalvation said...

u dont believe, wen i readingur blog tht time i m actually crying & want to die, so read ur blog wid tears in my eye u know wat!! Cosmos saare imethehan wahin aake khatam ho jate hai jahan sabhi savalon ka jawab mil jata hai!!

kuch aise hi pane main bhi tatol rahi hoon ki ek dwaar khul gaya hai!!
thnx for writing this post!!!

Vicky's world said...

shailesh lagta hai dil main kafi sawal hai jo shant hone ka naam nahi le rahe....

aur kafi achchi tarah se un sawalon ko parosa hai...

shandaar