Sunday, July 26, 2009

Dus saal: Kuch door, kuchh pass

Mujhe kuchh dino pahle tak bhi nahi pata tha ki Kargil Vijay Diwas ko kab manaya jaata hai aur sach bataun to aaj bhi mujhe pakka yakeen nahi ho raha tha ki Kargil ki jeet hamne dus saal pahle hasil ki thi. Aisa lagta hai ki kuchh hi dino pahle ki hi to baat hai jab hum seena taan kar Tiger Hills aur Tololing par Tiranga lahrane ki baat karte the.
Aaj ke din bahut se logon bahut si baaten ki, aur shayad main bhi kuchh aisa hi likhne ke mood se baitha tha. Lekin jab beete hue saalon par ek nazar dali to aisa laga ki jaise bahut kuchh badal gaya hai lekin phir bhi kuchh baate purani ho chuki hain ye yakeen nahi hota.
Kargil ki ladai me Pakistani fouj ki naak me dum karne wali Bofors toup jo ki 1999 ki is ladai ke baad har media channel ne TV screen par dikhai, waheen Bofors deal me sabse zyaada kamai karne wale Quatrochi ko humari sarkar ne clean chit de di.
Ek bahut hi badi khushi ki baat hui aaj tak jo Congress party apne aapko Kargil se jude har mudde se door rakhti thi aur BJP ko Kargil ke naam par kosa karti thi, wahi party aaj Kargil Vijay Diwas par poori tarah se shareek dikhai di aur Manmohan Singh ji ne humare shaheedo ke balidan ke badle me is desh ko bulandiyon par le jaane ki baat ki.
Lekin in dus saalon me hum log un netaon ko bhi kuchh nahi bigad paye jinhone ghinonepan ki had karte hue humare veer jawanon ke tabooton tak ko khane ki harkat ki thi.
Lekin jab kuchh na badlne ka yaad aaya to TV par Kargil aur Drass sector ki wo chotiyaan dekh kar mujhe wo din yaad gaye jab 1999 me Kargil ki jeet ke theek baad humare school me Kargil file ko lekar sab ek saat ek mission me jut gaye the.
Mission ke commander ke tour par Ganpat Singh Kunwar (Singh Sir) chune gaye. Singh sir, NCC ke pahle trainer rah chuke the aur waise bhi deel dol se koi bhi unko fauj ya me police ka retired officer samjhane ki bhool kar sakta tha.
Har claas ko apni ek alag file taiyyar karni thi jo ki class wise competition me jaati, aur jo log individual competition me jaana chahte the wo apni file personally submit karne wale the.
Kul mila kar goal ye tha ki students zyaada se zyaada samajh sake poori ladai ke baare me aur un logon ke baare me jinki wajah se saara desh aaj chain ki neend se sota hai aur sukoon se apna kaam karta hai.
Shuruati tour par hamesha ki tarah mujhe pata nahi tha ki kya ho raha hai, lekin jab thoda dhyan lagaya to pata chala ki karna kya hai. Dimag thoda dheere chalta hai is liye individual competition me jaane ka to khayal aana bhi paap hai lekin phir bhi Class wise compitetion me to battle field open tha. Wo bhi isliye ki Class XI thi sabhi log naye the aur wo bhi session ka pehla maheena tha to hamesha ki tarah mujhe is baar phir se ladkiyon ko impress karne ka ek naya mouka mil gaya.
Do ya teen dino me naam likhne shuru ho gaye aur files aur rules bhi fix ho gaye the. Class wise competition ke liye file me 50 pages the aur individual me 30 pages jinhe pictures, drawing, painting, poem, articles aur paper cutings se complete karna tha.
Kaam shuru hone ke shuruati do ek din to aise hi chale gaye lekin dheere dheere main is file me kuchh zyaada hi gahra utarta gaya.
India Today, Outlook, Nayi Duniya, Dainik Bhaskar aur na jane koun koun se news papers aur magazines ka intazaam karne lage hum log. Naye naye naare jaise "Dhoodh maango to kheer denge, Kashmir maangoge to cheer denge" kai saare hum ne jama kare. Pata nahi wo josh kahaan se tha shayad is hi liye Singh Sir ko chuna gaya tha.
Class file par karte karte mera ek naya dost, Jaydeep, kuchh alag sa karta nazar aaya, jab maine poocha to pata chala ki uski individual file hai jo abhi tak aise hi rakhi hai aur usne kuchh bhi nahi kiya hai. Seedhe tour par mere paas ek aur file aa gayi thi jis par mujhe kaam karna tha.
Is hi beech kaam karte karte mere dimaag me kuchh photos ghar karte ja rahe the jo aaj bhi meri aankhon ke saamne utne hi saaf hain jitne ki un dino me the.
Jaise ki Major Vivek Gupta ki patni Capt Jayshree Bisht ka apne pati ko aakhir salute karna, Vikram Batra aur unke bhai ka apni maan ke saath ka picture aise bahut se scene the jo dimaag ki hard disk me feed hote ja rahe the.
Uske thode din baad Dada (my elder brother) ko ghar par file par kaam karte dekha, ek aur file par kaam karne ka mouka mil gaya.
Is tarah se maine kul milakar lagbhag 12 se 13 files par kaam kiya.
Final results ke time par humari class ko first aur Dada ki class ko second place mila, individual file me bhi us ek file ko first place mila jis par maine kaam kiya tha.
Maine apni file nahi banai lekin sahi mano to mujhe kaam karne me wo sukoon mila jo shayad khud ki file banane me na milta, un logon ko jaanne ka mouka main kho deta, shayad mere dimaag ki hard disk khali rah jaati.
Singh sir aaj un logon ke saath hain jo Kargil me humare desh ko bachane me shaheed hue the. Aur shayad wo bhi unhe ye hi dus saal purani kahaani suna rahe ho.
Thank you sir to give me an opportunity to get to know our true heros
Thank you to everyone who trusted me to work on their files
And thank you to all of you in the uniform to save us and for making us feel proud of our nation.

1 comment:

nothin.. within said...

main bhi bilkul yahi soch rahi thi jab TV par dekha to pata chala ki kargil ko 10 saal ho gaye. Aur mujhe 9th pass kie 10 saal ho gaye :-/