Kayada

Aazadi ke 60 saalon ke poore hone ka khas mouka, har saal to subah un gaanon ko sunkar neend khula karti thi, jab chhota tha to bade savere hi is tyohar ke jashn ke liye saleeke se taiyyar hokar school ke liye nikal jaata tha raaste me aane wali har doosri manzil par tiranga laga hua dikhai deta tha aur kaano me to sirf aur sirf desh bhakti geet hi sunai padte the.

School se loutate waqt laddoo milte the aur ghar pahunch kar daadi ka banaya hua halwa aur chacha ki layi hui jalebiyan.

Lekin aaj sa kuchh badla hua sa shuru hua, na subah subah desh bhakti gaane, na koi bhashan, na parade, na koi mithai na hi koi badhai. Yeh theek subah ka haal tha lekin jaise jaise din beetane laga halat badalte chale gaye.

Shaam hote hote kal ki beshumar dimaagi aur jismaani mehnat rang layi aur desi khel ke rang me rangi 'Chak De India' dekhi to aisa laga ki aaj tak main bhi kitni badi galti karta aaya hoon. College me har baar apna intro dete waqt pradesh ka naam bataya. Kya zaroorat hua karti thi uski kya sirf naam bata dena hi kaafi nahi tha kisi professor se padh lene ke liye. Aur is hi baat ka ehsaas mujhe is film ne karwaya ki agar hum sirf apne pradesh ke liye kaam karenge to desh ka kya hoga.

Is film ke dialouges ne har lafz ka behatareen istamaal kiya hai lekin fir bhi main jo chahta tha aaj ke din wo nahi mila is film se. Shayad jo mujhe chahiye tha wo to kaheen aur hi mera intazaar kar raha tha ghar ke raaste me mera hi ek bhai jo ki masoomiyat ya kaam ki maar se raat ko Tiranga utarana bhool gaya tha maine apna farz nibhate hue use us kayde ke baare me bataya jo maine kareeb char saalon ki kadi mehnat ke baad seekhe hain. Aur shayad use seekhne ka mouka na mila aur khushi is baat ki hai ki 'Mehboob Bhai' ko bhi is par koi etaraaz nahi tha.

Ghar ja kar dekha to bharat pakistan ke moujooda haalat ko lekar bahas chhidi hui thi, loktantra-tanashahi, ye dono kisi desh ke vikaas par kis had tak asar daalte hain poll ke aankade saaf dikha rahe the. Poori bahas ke douraan ek hi baat baar baar saamne aa rahi thi ki loktantra hi kisi bhi desh ke liye sabse sahi raasta hai aage badhne ka lekin loktantra me kaanoon sabke liye ek samaan hone chahiye, kaayde aur kanoon is tarah ke tantra ke liye reed ki haddi hain. Phir wo chahe kayada Tirange ko andhera hone ke pahle utaar lene ka hi kyon na ho.

Aur aise mouke par ek hindustani hone ke naate apne hi bhai ko anjaane me us Tirange ka apmaan hone se bachane ke sivay main aur ko desh bhakti ka kaam nahi kar sakta tha.

Rone Nahi Diya....

Patthr bana diya mujhe rone nahi diya.
Daaman bhi tere gham ne bhigone nahi diya.

Tanhaiyaan tumhara pata pochhati rahien.
Shab bhar tumhari yaad ne sone nahi diya.

Aankhon mein aa ke baith gaye ashkon ki tarah.
Palkon pe khoye khwaab ko pirone nahi diya.

Dil ko tumhare naam ke Aanso azeez the.
Duniya ka koi dard nazron me samaney nahi diya.

Yun us ki yaad chali haath thaam ke mele mein.
Is jahan ko mujhse khone nahi diya.

Pather bana diya mujhe roonay nahi diya.
Daaman bhi tere gham ne bhigone nahi diya.

Filmy Chakkar..

“Yaar six years is such a long period.” “Wo achchha aadmi hai yaar.” “Usane kitana kuchh kiya hai desh ke liye.” “Wo munna bhai hai.” “Galati chhoti si hi thi aur wo bhi 14 saal pahle hui thi.” Ye sabhi vakya baan, TADA adalat ke aakiri faisale ke bare me kee gayi meri tippani ke pratyutar ke roop me chalaye ja rahe the.

Ek pal ko agar socha jaye to shayad ye sabhi baaten kisi ko bhi Sanjay Dutt ke liye hamdardi paida karne ke liye kaafi hain, aur agar sach kahoon to TV par jail jaate hue ‘Munna’ ko dekhana mere liye bhi dardnaak hi saabit ho raha tha. Pichhale kuchh salon me is ‘Khalnayak’ ne jitane bhi kaam kiye hain unke baad usane beshak ek achchhe Hindustani hone ka saboot pesh kiya hai. Khaskar ‘Lage raho’ne jab poore desh me Gandhigiri failayi to ‘World Space’ ke is RJ (Radio Jockey) ne tamaam duniya me RJ ki nayi paribhasha de daali ‘Revolution Jockey.’

Lekin in sabhi ko dekhakar jazbaaton ke bahav me bahna aur yeh kah dena ki “jo bhi hua achchha nahi hua.” Yeh baat to mujhe Hajmola to kya julaab ki sabse umda kism ki khuraq se bhi hajam nahi ho sakti hai.

Aise kai karan hain jo mujhe aisa sochne par majboor karte hain jabki main bhi apane aap ko ‘Sanju Baba’ ke chahne walon ki jamaat me shamil karta hoon.

TADA adalat ne kul milakar 12 ko saza-e-mout aur 20 ko umar quaid sunai hai jisase Sanjay Dutt saaf tour par bach gaye.

Agar Sanjay ke purane career par aur life style par gour karen to unhone kabhi aisi koi film nahi banai jo desh ke bare me baat karti ho, Sunil Dutt ke shuru kiye gaye ‘Nargis Dutt Cancer Foundation’ me bhi koi madad ki eent unke hathon se nahi lagi, drugs ki lat chhudwane ke liye videshon me ilaj chala aur shaadi se pare muhabbat ka rishta talaq lekar saamne aaya. Aur sabse badi baat jo aaj bhi duniya ki surkhiyan bani hui hai – 3 Ak-56 rakhane aur saboot mitane ki koshish karna aur logon ko uske liye uksaana.

Jab ye sabhi ‘Galtiyan’ ho rahee theen tab Sanjay Dutt apani umar ke lagbhag 32 basant poore kar chuke the aur is umar me ki gayi galityan, galtiyan nahi Gunaah kahlati hain.

Ek Gunaah hi sazaa Gunaahgaar ko milna lazmi hai uar wo bhi tab jab gunaah itana sangeen ho.

Agar Sanjay Dutt ke paas Media naam ka Bramhastra na hota to ye hamdardi logon ke dilon me paida hone ki gunjaish katai paida na hoti. Aur agar yahi hathiyaar doosaron ke paas hota to shayad wo hi kuchh aisi hi hamdardiyon ke haqdaar hote.

In sabhi baton ko kekhne ke baad bhi agar kisi man me Sanjay Dutt ko mili saza zyada ya phir adalat ki zyadati lagati hai to wo insaan ek baar apni aankhen moond kar apne aap ko us ghar ka hissa banakar dekhe jiska koi ek shakhs un dhamakon ka shikaar ho jiske saath Sunjay Dutt naam juda hai. Phir man me kam ya zyaada ka khayal chhodkar ek hi faisla dikhai dega jo film ‘Vastav’ me Sanjay Dutt ki maa Reema Lagu ne kiya tha.