Tuesday, May 22, 2007

Haqeekat


Duniya, duniyadari, rishtey, jazbat, achchhai, burai in sabhi ke baare me bahut kuchh sunne aur janne ke baad bhi aaj tak ek sawal dil ke kone me aur zahan me har jagah achanak se ghoom jata hai. Bahut se logon se alag alag tareekon se poochhne ke baad bhi jawab har baar lagbhag ek sa hi raha. Shayad duniya ke dekhane ka tareeka alag aur samajhne ka tareeka alag hota hai kyonki kisi rishte ka hona bhi alag hota hai aur use samajh lena bilkul hi alag.
Agar duniya me kisi se bhi poochha jaye ki kisi "Maa" ka beta hone ke liya kya chahiye to ek zaahir sa jawab milega ki uske liye aapko uske jism ka hissa hona chahiye yani ki us aurat ki hi paidaish. Waqai apne jism me ek aur jism ko palna kisi "shakti" ke hi bas ki baat hai. Lekin apni kokh me palna hi kya Maa jaise bade samman ko pa lene ke liye kafi hai? Kyonki duniya me aana aur duniya me rahna do alag alag batein hain. Aur mere hisaab se duniya me rahna jo sikhlaye wahi Maa hai aur duniya ke jazbaat bhi kuchh aisa hi kahte hain.
Dharm ki baat ho ya media ki, har jagah Maa ne apni mahanta ko bina kisi takalluf ke barkarar rakha hai. Krishna aur yashoda, Paigambar hussain aur unki ammi ki baatein dharm me aaj bhi jee rahi hain. Wahin kisi bachche ko janam na dene ke baad bhi use apna hi maan kar duniyadaari sikhane waali Maaon ne Media me bhi darshakon ke dilon par raaz kiya hai. Bachchon ki pahli pasand "Jungle Book" me mogali ki maa chameli, Big 'B' ki hit film Ajooba me Dolphin ya phir haal hi me TV par dikhaye ja rahe Big Babool ke ishtahaar me chidia aur kachhue ki kahani, sabhi ke sabhi dekhne walon ke dil ko barbas hi gher lete hain.
Saari baaton ko ek saath dekha jaye to bhi mujhe samajh nahi aata hi kya samjhoon aur kya nahi. Shayad duniya me kisi bhi Maa ke liye teeno lokon me kisi ke pass bhi koi paribhasha na hogi.
Ek aise bachche ko duniya ka lag-bhag sab kuchh dena jise aapne janam na diya ho. Apne bachchon ke saath use bhi palna, uski pareshani ke pahle hi hal ke liye jut jaana, uske pet ko bharne ke liye khud ke nivale dena aur use bistar par sula kar khud zameen par sona, aise kaam kisi devta ke bhi bas me na rahe honge. Saari duniya me ghoomun ya poori zindagi khatm kar doon lekin ye paheli hamesha paheli hi bani rahegi.
Har din ek naya roop, har baar naye jazbaat lekin pyaar ki barsaat me hamesha izaafa hi hota chala jaata hai aur mere jaise bewkoof paribhashayen hi dhoondhte rahte hain. Jabki sach to yeh hai ki duniya ka sabse chota lafz hi aisa hai ki hazaron granthon aur mahakavyon ko likh dene ke baad bhi iska poora bakhan koi nahi kar payega.
Kyon ki Maa to sirf Maa me hi poori dikhai deti hai.

4 comments:

Sh'shank said...

Jo bayan kiya hai tumne
Us bayan ne buniyaad tikki hai...

Cosmos I have wondered several times when you are such a powerful writer why wouldnt you do more in english and I just figured its because you love urdu and hindi more than anyone.
I am impressed.
And speechless even though my rambling doesnt suggest the same...

Me Thinks.. said...

WHn I read this the first time I knew only you could have written something like this so well..

VEry touching and brilliantly written..

last line definitely gives the punch!

Cosmos said...

@ Pricky.. Thanks and you are right that I love both the langauges so much. And i think what ever i can express in hindi and urdu cant in any other.

@MT.. If it is really touching then whole purpose of this post is achieved.
Last line.. Mera last hamesha hi puhching hoga, you see

bhavna2716 said...

very touching .....
baki al u wrote i think usake bad kuch bachta hi nahi.. aur maa ke bare me likhne ke liye shabd dhoond paana bada mushkil hai n u did it very well