Tu.

Pyaar ka meetha ehsaas dilane lagi hai tu
Ab to mujh se mujhi ko churane lagi hai tu.

Teri chahatoon ka chhaaya hai saroor is qadar
Har pal har jagah nazar aane lagi hai tu.

Veeraan thi yeh zindgi tere aane se pehle
Khushiyoon ke sapne mujhe dhikane lagi hai tu.

Har pal mujhe hota hai bas tera hi ehsaas
Is qadar meri saanson mein samaane lagi hai tu.

Ek pal ki bhi doori seh nahi paata hoon main
Hoke juda kyun mujhe azmaane lagi hai tu.

Raah chalte hue aksar hota hai yeh gumaan
Ke ban saaya saath mere aane lagi hai tu.

Doorie...

Kisi ko kho dena ya kisi se bichhad jana, alag hone ka dukh ya judai ka gum, yeh sab har ek insaan ki zindagi me kaheen na kaheen, kisi na kisi mod par uske saamne khade hote hi hain. Insaan samaj me rahne wala ek jaanwar hai jo ki samaj ke doosare jaanwaron ke saath samaaj me hi rahna pasand karta hai.

Kisi naye insaan se milna par apni jagah, naam aur rutabe ko bachate hue uske saath dosti karta hai. Aur use in teenon par kisi bhi tarah ka koi khatra dikhai deta hai to naye insaan se dooriyan bhi us hi hisab se rakhi jaati hain. Yaani jitana bada khatra utni hi badi doorie.
Lekin yeh chhota sa insaani dimag aur itani badi duniyadaari. Kabhie kabhie ye wo samajh leta hai jo hota nahi hai aur kabhie wo bhi nahi samajh pata jo aankhon ke saamne din ke aathon pahar chalta rahta hai.

Sach kahoon to itane saare lafzon ko likh dene ke baad bhi main abhi tak yeh soch raha hoon ki main ki main likhna kya chahta hoon. Aaj tak bahaduri ki badi badi deengen hankane wale 'Aalampanah' ko waqt ke sirf ek chhote se dav ne charo khane chitt kar diya.

Kai maheene kuchh logon ke saath rahne, kaam karne aur ladne ke baad maine socha tha ki aakhiri din yahan se jaate waqt mujhe sirf meri gaadi ( jisme main bangalore chhodne wala tha) aur mera kaam dikhai dega aur aakhiri ke dinon tak aisa hi tha. Lekin aakhiri ke un saat dinon me to jaise sab kuchh ghoom hi gaya. Jaise jaise log ja rahe the waise waise zindagi ke kuchh hisse kam ho rahe the aur saath hi zindagi ke ruk jaane ka darr bhi badhata ja raha tha. Par abhi tak housala bana hua tha ki mere jaane se kisi ko koi fark nahi padata. Lekin ek raat kisi ki siskiyon ne mere is bharam ko chakna choor kar diya.

Fir to aisa lag raha tha ki poori zindagi ko jaane ke pahle hi samet loon. Har ek dost jise meri zaroorat hai use apne daaman me sahej loon. Magar mumkin aur namumkin ki samjh hai mujhe aur mujhe pata hai ki yeh mumkin nahi.

Gam hai ki aaj hum saath nahi lekin khushi is baat ki hai ki kuchh aur bhi aise log hain jinhe meri zaroorat aur fikr dono hai.
Sabhi ke liye yeh 'Pakau aur Paagal' abhi bhi wahi hai jo tumhare bagair hamesha adhoora hai. Tum sabhi meri wo jaaydaad ho jo main kisi bhi keemat par apane paas se jaane na doonga.
Miss you so much :(