Badlaav

Duniya ke adhikatar logon ko maine kahte hue suna hai ya phir yoon kahoon ki chhapi hui kitaabon me padha hai ki "Badlaav har kisi ko raas nahi aata", aur kuchh aisa hi mera khayaal bhi raha tha aaj tak. Lekin waqt ek aisi takqat hai jo jaan se pyaari cheez ko dushman aur dushman ko bhi jigar ka tukada bana dene ki koowat rakhti hai.
Lagbhag teen saal pahle chhoda hua meri zindagi ka koi waqt mujhe phir se milne par itana sukoon de jayega maine kabhi sapne me bhi nahi socha tha. Tamam faisle karne ke baad jab maine un lamhon ko pair me chubhe kisi kaante ki tarah nikal kar phenk diya tha to mujhe nahi pata tha ki jab wo kanta mujhe milega to kisi gulaab ki tarah mere dil-o-dimaag ko mehka jayega.
In lamhon ki shuruaat maine ek Company "Success marketers" ke saath ki aur kaafi mehnaton ke baat maine apne pairon jamana shuru kar diya tha lekin ek waqt mujhe laga ki yeh sab mere bus ka nahi hai aur main yahan par wo nahi kar sakta jo main chahta hoon.
Khair baat ye nahi hai ki main kya chahta hoon aur kya nahi, lekin ye hai ki maine jiske layak apne aap ko kabhi nahi samjha wo hi kaam aaj bhi mere andar basa hai ye maine ab jaana.
Media Industry me jaane ke khayaal ke baad hi maine Marketing ke baare me bhool kar bhi nahi socha lekin jab kal main apne waqt ko kisi kaam me laane ke mood se Bangalore me base ek bade se aashram ke sabse Keemti sazo saaman ki dukaan ke Gahnon ko bechne ke liye baitha to maine us waqt bhi apne bhoot(kaal) ki aur koi tawajjo nahi di. Grahak aate gaye aur main sirf apna kaam karta gaya na dimaag me saamne wala grahak tha aur na main dukaandaar. Bas wo log jo mangte wo main de deta aur jo poochhte uska jawab de deta, iske sivaye aur kuchh bhi dimaag me nahi aaya poore din.
Aap ko lag raha hoga ki Gahanon ki dukaan par jab Khoobsoorat ladkiya aati rahengi to bhoot ko yaad karne ke liye mere paas waqt hi kahan hoga :-). Lekin main aapko bata doon ki wahan par bahut tarah ke log aate hain, har umar ke, har jaati ke, desh ke har kone se aur duniya ke kuchh koochon se, ladke, ladkiyaan, aadami aur aurat sabke darshan aapko is ek hi jagah par khade hone par mil jaayenge. Aur agar aap ek baar inke sawaalon me pad gaye to shayad Rashtrapati pad ke liye bhi agar koi Interview hoga to wo bhi saral hi lagega.
Sawaalon ke andaaz bhi alag tarah ke hi hote hain --
?: -Aap kahan rahte hain?
!: -Bangalore me.
?: -Bangalore me rahte hain to bhi aapko hindi aati hai ( Jaise Bangalore ki border me ko magnetic field hai jo under aate hi hindi ka gyan kheench leti hai.)

?: -Kya aapke paas Lakh ke earrings hain? (a woman from gujrat)
!: -Hain kuchh lekin unke pair nahi mil rahe hain aur sirf ek aap pahnengi nahi
?: -Lekin keemat to bataiye iski
!: -Ek ka aap kya karengi wo to ladkon ke pahnne ke liye hote hain.
?: -Ladke to aapke counter par aayenge nahi
!: -Galat fahmi hai aapki wo hi zyaada aate hain, aap jaise logon ke liye lene
?: -Hmm it makes sence (Lagata hai inhe kisi ne aaj tak koi gift nahi diya)

Ek Bengaali aunty ne to had hi kar di thi, bahut der tak har tarah ki cheeze dekhne ke baad ek haar unhe pasand aaya wo bhi tab jab unhone wo mere gale me pahna kar dekha. :)
South Africa se aaye ek bhai sahab aakar sab kuchh ke baare me poochh gaye jaise yahaan ke gahno par research karne ka world wide project mila ho. Uske baad bhi khareed kar wo le gaye jis par meri nazar thi (Koi baat nahi ab to aadat si ho gayi hai)
Lekin jab raat me baaton baaton me logon ko ye pata chala ki main ek Khabarnigaar hoon to logon ke muh khule aur aankhen phati si rah gayee.

?: - Aap journalist hain? Phir yahan kya kar rahe hain?
?: -How do you know about jwells and all?

Saare ke saare sawaal hi karne me lage the aur har baar ki tarah is baar bhi main sirf jawaab hi de raha tha. Mera bheja bhi tab bilkul hat gaya jab maine Bill par nazar daali.
Jab maine total kiya to main samjha ki main 'quanta' bilkul hi bhool chuka hoon, kareeb teen baar total karne ke baad bhi jab amount wahi aaya to mujhe laga ki aaj bhi wo puraani taaleem mere andar kaheen dabi padi hai jo aaj phir baahar nikal kar aa gayi.
Sirf char ghanton me business 24,000 ka jo ki bina kisi mehnat ke kiya gaya tha aur wo bhi sirf baaton baaton me, aur andarooni khushi ke saath.
Mere dimaag me abhi bhi baat samajh yeh nahi aa rahi hai ki ye sab nateeja kiska hai, Marketing skills, Experience ya phir CHANGE of job.